Bahnverkehr löppt na Streik wedder an
De Bahnverkehr in Noorddüütschland deiht bilütten wedder anlopen. De Düütsche Bahn sülvst verwacht an'n Friedag noch en unregelmatigen Verloop.
De Wohrschustreik vun de Lokföhrers ehr Gewarkschop, GdL hett an'n Dünnersdag den Bahnverkehr in Noorddüütschland deelwies stoppt. Ok in Sleswig-Holsteen sünd güstern sodennig vele Verbinnens utfullen, vör allen in’n Feernverkehr, man ok de Regionalverkehr weer bloot utdünnt ünnerwegens. De Bahn hett ehr Kunnen anraadt, ehr Fohrtenop den hüdigen Friedag to verschuven. Dat Ünnernehmen versöcht mit Priotität, den Verkehr up dat Spoor wedder in Gang to kriegen, sünnerlich för dat Weekenn. DB-Baas Achim Strauß see dor güstern den NDR to:
Achim Strauß: Friedag is ja en Dag mit en sünnerlich grote Nafraag, un nu kaamt dor ok noch dee to, de egentlich hüüt föhren wullen un dat op morgen schaven hebbt, also uns Priorität is, morgen, an düssen wichtigen Friedag, den Verkehr wedder in Gang to bringen.
Seggt Achim Strauß, Baas vun de Düütsche Bahn. Dee rekent vundag mit en grote Mass an Fohrgäst un sodennig vulle Töög. Upto is ok de Göderverkehr vun den Streik hart drapen worrn, hunnerte Töög sünd folgens Strauß to laat. Dat will de Bahn mit Sünnerschichten oplösen. Wannehr nu twüschen de Tarifpartners wieder verhannelt warrt, is noch nich kloor. De Bahn harr as Reakschoon op den Streik Terminen afseggt. De Baas vun de GdL, Claus Weselsky, see güstern, een harr ja liekers Verhannelns afmaakt, wannehr dat wiedergüng, wüss he nich to seggen. He see ok, dat mehr Wohrschustreiks mööglich weren, ok rund üm de Wiehnachtsfierdaag.
