Habeck bekiekt Stormschadens an de Oostsee
Groten Besöök för de lüttste Stadt vun Düütschland. Op sien Stormschaden-Törn dörch den Kreis Sleswig-Flensborg hett Bunnsweertschopsminister Robert Habeck ok in Arnis inkeken.
Robert Habeck kinnt de Region goot un leet sik ok an de Slie över de Schadens informeren.
Robert Habeck: Een markt dat an de Lüüd, an de beleggte Stimm, an de trurigen Ogen, dat se schier vertwiefelt sünd. Existenznoot sodennig. Ik bün ja den Dag hier ünnerwegens. Dat heff ik an de Slie sehn. Hier in Arnis. Un achteran föhr ik na Flensborg, un dor warrt dat nich anners ween. Dat binnt mi, so goot ik dat kann to hölpen.
Een vun de, de Hölp goot bruken köönt, is Ralph Timm. Wat he harr, hett he verloren. Sien Huus is toschannen. He hööpt op Hölp.
Ralph Timm: Wi bruukt afsluuts finanzielle Ünnerstütten, anners gah ik hier koppheister. Afsluusts.
Hölp kunn vun Bund un Länner kamen. Folgens Habeck warrt över en Solidaritätsfonds nadacht.
Robert Habeck: Ik gah dorvun ut, dat dat klappt. Ik heff dat bi de Ministerpräsidentenkonferenz as so’n Handslag verstahn – ja, dat maakt wi so. Daniel Günther hett dat vördragen, un de annern hebbt seggt, ja, wenn dat jümmers so is, denn maakt wi dat nu so. All hölpt sik gegensiedig.
De Diek in Arnis is op en Längde vun 60 Meters eerstmal mit Sandsäck dicht. So gau as dat geiht, schall he wedder op Schick bröcht warrn. Hoochwater – en Gefohr, de grötter warrt, dor sünd se sik eenig in Arnis. Man nu geiht dat eerstmal dorüm, den neegsten Dag to bestahn.
Sowiet de Bericht vun Jochen Dominicus in’t Sleswig-Holsteen-Magazin vun’n NDR. Plattdüütsch bearbeidt vun Jan Graf.
