In Gang - Karin Zimmermann un de English Dinner Club
Siet mehr as teihn Johren freut Karin Zimmermann sik op jeedeen letzten Friedag in’n Maand. Denn dröppt se sik in en Gaststuuv mit ehren English-Dinner-Club. Dorto höört teihn Frunslüüd, de all geern engelsch snackt. Sogor dat Eten mutt op engelsch bestellt warrn.
Jeedeen letzten Friedag in’n Maand draapt se sik, de teihn Fruenslüüd vun den English-Dinner-Club. Een dorvun is Karin Zimmermann ut Breiholt. Se is vun Anfang an dorbi un dat is al bannig lang. Mehr as teihn Johr gifft dat den Club al. Se draapt sik meisttieds in en thailannsch Gasthuus, dat Bunthai, in Elsdörp-Westermöhlen. De Kring is internatschonal. Mit dorbi sünd ok Grace ut Kenia, Anita ut Kanada un Margret ut Brasilien, man se leevt all al vele Johren in Düütschland. Karin freut sik op jeedeen Drepen, wiel dat jümmers soveel nieges gifft bi all de ünnerschedlichen Fruenslüüd un wiel se all tohoop jümmers so vergnöögt sünd.
Karin Zimmermann: Vör ungefähr teihn, ölven Johr hett Margret dat in’t Leven ropen, dat een sik mal op Dörp drapen deiht, üm Engelsch to lehren. Un nu draapt wi uns eenmal in’n Maand bi den Thailänner, bi Malte, in Elsdörp-Westermöhlen. Un denn mutt een natürlich twee Stünn engelsch snacken , vun halvig acht bet halvig teihn. Wi eet tosamen un dat mutt allens op engelsch bestellt warrn. Ok wenn een sik wat vertellt, mutt een dat jümmers allens op engelsch maken. Wenn een denn mal en Woort fehlt, denn hölpt de Annern. Wi draapt uns eenmal in’n Maand, avers wi gaht ok mal to’n Wiehnachtsmarkt oder wi hebbt ok al mal tosamen Oorloff maakt. Wi weren in Büsen, ok na Damp sünd wi wesen un in Sankt Peter. Jümmers so en poor Daag. Wi hebbt tosamen heel veel Spaß un een mutt jo seggen, dat is ok richtig wat, to’n engelsch lehren. Ween een sik nu eenmal in Maand drapen deiht, för twee Stünn, denn sünd dat jo in’t Johr 24 Stünnen un in teihn Johr weeren dat denn jo all 240 Stünnen. Insofern scheelt dat wat.
In teihn Johr weren dat al bloots bi de maandlichen Dreepen 240 Stünnen. Man dorto kaamt ok na de gemeensamen Ünnernehmen un Oorloffen. Dor dörft denn jo ok man bloots engelsch schnackt warrn. Dat lööpt allens ünner “learning by doing”. Den English-Dinner-Club öövt nich blots engelsch, se hebbt ok so heel veel Spaaß tohoopen, seggt Karin Timmermann.
Karin Timmermann: Jo, dor sünd Fründschoppen ut wussen un wenn de een oder anner wat to fiern hett, denn warrt Kranz bunnen, dor hebbt wi ok bannig Spaaß bi. Denn warrt sludert un vertellt, wenn een wat to fiern hett oder wenn een ut’n Oorloff wat to vertellen hett, wenn een verreist weer oder ok ut de Familien. So kennt een den annern un jeedeen freut sik, wenn een sik dröppt.
Ja, dor warrt sik heel veel vertellt un dörchweg op engelsch. Af un an fallt een mal in de düütsche Spraak torüch. Man denn passt de Annern al op, dat ok glieks wedder engelsch snackt warrt. Oppassen, dat engelsch snackt warrt un twoors richtig, deiht ok Anita Smith-Sievers ut Elsdörp-Westermöhlen. Se is as Kanadierin “Native-English-Speaker" un hett ok heel veel Spaaß bi de Drepen vun den Club.
Anita Smith-Sievers: Sik mit so veele ünnerscheedliche Frunslüüd to drepen, de all ut ganz verscheden Levenssituatschonen kaamt, de avers verbinnt, dat all geern dat Engelsche möögt un veel Spaaß tohopen hebbt, dat is jeedeen Mal en schöne Tiet. Dat kann een sik vörstellen.
Kloor, dat is goot to verstahn, dat all de verscheden Frunslüüd bannig veel Spaaß hebbt, wenn se sik drepen doot. Karin Zimmermann freut sik all op dat neegste event mit ehr Frunslüüd vun’n English-Dinner-Club. Se plaant al tohopen en Utfloog to’n Wiehnachtsmarkt un denn warrt dor wedder orntlich op engelsch snötert.
Mit de Sennreeg "In Gang" stellt PLATTRADIO Minschen vör, de sik för en Saak begeistern köönt. Büst Du ut Sleswig-Holsteen un magst op Platt vertellen, för wat Du brinnst? - Mell Di bi uns:
