Kapteinsch sammelt Geld för Lootseninsel
De Johrhunnertstormfloot an de Ostsee hett veel kaputt maakt. Ok de Lootseninsel Sliemünn hett dat hart drapen. Man de Willen vun de Minschen to hölpen un to ünnerstütten is groot. Dat wiest ok en Akschoon vun de Kapteinsch vun den Utfloogsdamper MS Kappeln.
Kapteinsch Juliane Sebode wiest ehr Utfloogsgääst normalerwies de smucken Sieden vun de Slie. Man düsse Fohrt is anners. Dat Highlight vun de Tour, de Lootseninsel Sliemünn, dörf na de swore Stormfloot an 19. Oktober nich betreden warrn. Veel is dor twei gahn un Scheep dörft to Tiet nich anleggen. Ok de Anleggsteed is twei.
— Juliane Sebode, Slie-KapiteinschIk kunn dat gor nich faten, sowat Leegs heff ik noch nich beleevt.
Juliane Sebode: Ik kunn dat gor nich faten, sowat Leegs heff ik noch nich beleevt. Dat weer bannig dull. Ok in Arnis weer allens afsapen. Mien Söhn hett al as Kind dor speelt un in’n September hett he sik op de Lootseninsel mit sien Fründin verlööft. Uns Leven speelt sik so to seggen dor af, dat is för uns en twete Heimat.
Dorüm wüll se gau hölpen un den Wedderopbuu vun de Lootseninsel mit en Spennenfohrt finanziell ünnerstütten. 35,00 € hett en Fohrkort kost. 20,00 € gaht an de Lighthousefoundation. De gemeennüttige Stiften höört de Insel siet 2008 to. Een vun de Fohrgääst is Claus Schillmann.
Claus Schillmann: Dat is wichtig, Solidaritäät mit dat Rebeet Sliemünn un mit de Lootseninsel to wiesen. Üm düütlich to maaken, dat se erholen blieven mutt un dat man ehr gemeenschoplich sekern mutt. Dat is hier man en lütten Bidraag, avers dat is enfach wichtig, dat een dat deit.
Rund 1,5 Millionen Euro warrt den Wedderopbuu vun Sliemünn kossen. Alleen kann de Stiften dat nich schaffen. Dorüm is de Vörstand för jede Stütt dankbor. Kapteinsch Sebode hett mit düsse Fohrt un anner Akschonen bet nu meist 4.200,00 € insammelt.
Juliane Sebode: Beter wat maken as nix maken. Vun nix kümmt nix.
Se hööpt, dat se mit ehr Utfloogsdamper bald wedder an de Lootseninsel Sliemünn anleggen kann.
