Lannsregeren will Huushoolts-Nootlaag faststellen laten
De Sleswig-Holsteensche Lannsregeren will de Huushooltsnootlaag faststellen laten. Se reageert dormit op dat Oordeel vun’t Bunnsverfatensgericht to den Nadragshuushoolt 2021.
De Richters vun dat Bunnsverwaltensgericht in Karlsruh hebbt nee seggt. De Bunnsregeren dörf Geld, wat se as Corona-Noot-Krediten opnahmen hett, nich later na Klimaschuul- un Energiewenn-Projekten röverschuven. 60 Milliarden Euro liegt för de Plaans vun de Bunnsregeren nu op Ies.
Noch weet een nich, wat düsse Spröök vun’t Bunnsverfatensgericht för Sleswig-Holsteen bedüüdt, man CDU un Grönen in’t Land wüllt op Nummer Seker gahn un hebbt güstern en Ielandrag stellt. De Landdag schall de Huushooltsnootlaag faststellen. Dormit nich ok in dat nöördlichste Bunnsland miteens Geld infroren warrt, warrt egentlich mal för A opnahmen worrn is, man nu för B bruukt warrt.
Bispeel: De Toschööt to de Ansiedeln vun den sweedschen Batteriehersteller Northvolt in Heid. De Landdag harr dor in’n Septembermaand 137 Millionen’n Euro för friegeven – Geld, dat för wat anners afsehn weer: De Millionen stammt ut den Ukraine-Nootkredit. Al domals harr de Wetenschoppliche Deenst vun den Landdag in en Ünnersöken Twiefel, wat düsse Saak man ok na de Verfaten weer. Un apen Kritik leet de FDP hören. In’n NDR see domals de stellvertreden FDP-Frakschoonsvörsittersch Annabell Krämer:
Annabell Krämer, FDP: Sülvstverständlich freut wi uns to de Ansiedeln vun Northvolt, Dat is ok richtig, dat dat deelwies föddert warrt, dat Ünnernehmens sik hier dallaat. Man bidde nich ut Nootkrediten, de dor nich mit tohoophangt. Dat mutt ut den orntlichen Huushoolt betahlt warrn. De Middels mutt een ok nich binnen een Johr bedenen, un sodennig hett de Lannsregeren noog Tiet en soliden Huushoolt optostellen för de tokamen Johr, in den Northvolt en Rull spelen kann.
So Krämer in’n September. Un in den O-Toon is denn ja ok de Reed vun dat ene Johr, binnen dat Geld ut en Nootkredit utgeven warrn mutt. Dorto seen CDU-Frakschoonschef Tobias Koch un Grönen-Frakschoonschef Lasse Petersdotter, de Folgen vun de Krisen vun de verleden Johren worrn ok düt Johr wiederwarken un sodennig ok 2023 Infloot hebben op de Huushooltslaag vun’t Land. Dormit de Binnenjohrs-Grundsatz inholen warrn kann, müss een dorüm ok för dat Johr 2023 en besünnere Nootsituatschoon faststellen.
Kritik an düsse Logik kümmt ok vun de Präsidentsch vun den Lannsrekenshoff, Gaby Schäfer. Ehrgüstern see se, dat na dat Oordeel Nootkrediten nich op Vörraat opnahmen warrn dörft un denn in Trüchlagens un Sünnervermögens lagert. Dat weer avers in’n Noorden begäng, so Schäfer.
