MSC-Anbott för Övernahm vun HHLA toenn gahn
Lang is diskuteert worrn över den Verkööp vun Andelen an den Bedriever vun den Hamborger Haven, HHLA, an de Swiezer Reederie MSC. Klock Meddernacht leep nu dat Anbott vun de Rederie för de Aktien af.
All in’n September hebbt de Havenbedriever Hamburger Hafen- und Logistik AG (HHLA) un de swiezer Rederie MSC en Verdrag över en strateegsche Partnerschop slaten. 49,9 Prozent vun de Aktien will MSC övernehmen un deit dor de Aktionären 16,75 för elkeen Aktie anbeden, dat sünd goot 5 Euro mehr as de Aktien weert weern ehr dat Anbott för en Övernahm apetlich maakt worrn wöör. De Rederie will ok Hamborg deelwies Aktien afköpen. En knappe Mehrtall vun 50,1 Prozent schall noch in’n Besitt vun de Stadt Hamborg blieven, de sodennig liekers noch dat Stüer bi den Havenbedriever beholen deit.
— Søren Toft, CEO MSCHamborg schall uns Zentrale in Düütschland warrn.
As MSC middeelt, is dat Maal vun de Rederie, den Containerhannel vun Hamborg ut düchtig uttowieden un den Haven to en zentrale Steed vun ehr Logistikkeden un Containerdeensten to maken. Opto schall in de Havencity de niege Düütschlandzentraal ansiedelt warrn, de denn ok de Krüüzfohrtünnernehmens organiseert. Mit bet to 700 Arbeitsplätz mehr plaant de Rederie. Søren Toft, Baas vun MSC see dor den NDR to:
Søren Toft: Düütschland is en wichtigen Markt in Europa un Hamborg is en wichtige Stadt, en wichtigen Markt för MSC, un düsse Bedeligen un Tosamenarbeit heet, dat wi uns mehr op Düütschland konzentreren köönt, wi köönt mehr wassen. Wi warrt Hamborg as en Zentrum in uns weltwieden Nettwark uprichten. De Steden wonehm wi bedeligt sünd warrt na Hamborg hen verlagert, so dat wi hier würklich en Hööfdsteed för Düütschland hier in Hamborg grünnt.
Folgens den Hamborger Böverbörgermeester Peter Tschentscher weer düsse Tosamenarbeit en Mielensteen för den Hamborger Haven un de Stadt, wieldat de maritime Weertschop in sure Tieden föddert wöör un de Stadt liekers noch in geschäftliche Fragen dat letzt Wort beholen dee.
Anners süht dat vör de Arbeitnehmers un de Gewarkschop Ver.di ut. Se lehnt den deelwiesen Verkööp an MSC af un hebbt in de verleden Weken mit Demonstratschonen un Streiks - ünner annern wöör de Arbeit an’n Burchardkai för 24 Stünnen blockeert - up ehr Sicht opmarksam maakt. De Arbeitnehmers sünd bang, dat na en Verkööp vun de Andelen ehr Rechten nich mehr richtig wohrt sünd. MSC is en Familienbedriev, för de anner Regeln bi de Mitbestimmen gellt. Ok wohrschuut se, dat Arbeitssteden afbuut warrn kunnen. Christian Baranowski, Vörsitter vun den Bedrievsraat bi HHLA see den NDR:
Christian Baranowski: Twee grote Konzernzentralen mit Finanzafdelens un Inkööp, dor gaht wi vun ut, dat een dat tohoopfaten will un dat to Tarifbedingens bi MSC, de wi natürlich nich kinnt, un denn allens na MSC hen verlagert.
Öb dat Vörhebben vun Stadt un Rederie so klappt, is noch nich heel kloor. En groten Deel vun de Aktien is in een sonöömten verstreiten Besitt verdeelt, dat heet bi vele verschelen Besitters. Öb MSC noog Lüüd mit ehr Anbott övertügen kunn, warrt sik noch wiesen.
