Pooldoktors warrt künnigt
De Kassenärztliche Vereinigung Schleswig-Holstein hett wegen en Sotschalgerichtsoordeel to’n 31. Dezember 2023 400 sonöömte Pooldoktors künnigt. Dat sünd Doktors, de in’n Rohstand sünd oder Bunnswehrdoktors un Doktors, de in Deeltiet arbeit un sik as Praatheitsdoktors in Anlooppraxen to Verfögen stellt. Folgens dat Oordeel kunnen se tokamst ünner de Plicht to de Sotschalversekern fallen. Een Bidrag vun Marlen Hildebrand, NDR op plattdüütsch vun Dörte Riemer
In Sleswig-Holsteen gifft dat 30 allgemene Nootdeenstpraxen, ok Anlooppraxen nöömt. Dorto kaamt twölf för Kinner un opto Praatheitsdeensten avends un nachts över dat Land verdeelt. To Tiet arbeit dor 400 Pooldoktors op Honororbasis för de Kassenärztliche Vereinigung Schleswig-Holstein. Se entlast anner Doktors, de egentlich för den Praatheitsdeent tostännig sünd. De Kassenärztliche Vereinigung hett se bether betahlt, man nu rekent de KVSH wegen en Gerichtsoordeel mit Mehrkossen in Millionenhöchde, wiel se sotschalversekernsplichtig warrn kunnen. Dorüm hett se de 400 Pooldoktors to’n 31.12.2023 künnigt. Ralph Ennenbach, stellvertreden Vörsitter vun de Kassenärztliche Vereingiung Schleswig-Holstein see den NDR:
— Ralph Ennenbach, stellvertreden Vörsitter vun de Kassenärztliche Vereingiung Schleswig-HolsteinIn de eersten dree Maanden leevt wi sotoseggen vun de Hand in’n Mund.
In de eersten dree Maanden leevt wi sotoseggen vun de Hand in’n Mund. Wi warrt versöken, de dalaten Doktors to mehr Praatheitsdeensten to motiveren. Wiel Pooldoktors wegfallt, mööt se dat doon, wi mööt jedenfalls versöken, dat hentokriegen. Dat warrt avers Löcker geven, man de Löcker dörft nich to groot warrn. So see alph Ennenbach, stellvertreden Vörsitter vun de Kassenärztliche Vereingiung Schleswig-Holstein den NDR
Nachts arbeiden un över Dag de egen Praxis apen hebben, warrt swoor, seggt ok de Verband vun de Huusdoktors. Per Gesett kunnen de Huusdoktors dorto verplicht warrn, overs för ehr Patienten weer dat nich jüst wünschensweert, so Miriam Führ, stellvertreden Vörsittersch vun den Hausärzteverband Schleswig-Holstein Se see, ok in’n NDR:
Miriam Führ: Dor sünd, glööv ik, ok Pathologen dorbi, de ehren letzten leven Patienten in ehr Medizinstudium sehn hebbt. Dor mutt een sik goot överleggen, ob dat Sinn maakt, de to’n Nootdeenst to verplichten.
De Huusdoktors seeht en groten Barg an tosätzliche Arbeit op ehr tokamen. Ok de Noothölpambulanzen in de Krankenhüüs warrt noch mehr överlopen warrn as nu all. För de Doktors und de Kassenärztliche Vereinigung is klor, dat de Bunnsarbeitsminister hanneln müss, üm de Pooldoktors vun de Sotschalversekernsplicht to befrien. Bloots so kunnen de negativen Utwarkens vun dat Oordeel noch afwennt warrn.
