Narichten vundaag
01.12.2023
Staats- un Regerensbasen bi Klimatoppdrapen in Dubai
Bi de Beradens vun dat UN-Klimatoppdrapen warrt vundaag Staats- un Regerensbasen ut vele Länner verwacht. För Düütschland reist Kanzler Scholz na Dubai. Dor warrt mit rekent, dat Scholz sünnerlich to den vun Düütschland föddert “Klimaclub” sprickt. Den sien 33 Maten schüllt bi de Klimaschuul en vörste Rull spelen. Afsied vun dat Hööftthema schall wull ok över den Ukrainekrieg Raat holen warrn.
Afspraak to Scheethool löppt ut
In’n Gaza-Krieg deit vunmorgen den Scheethool twüschen de islamistsche Terrorgrupp Hamas un Israel to Enn gahn. Katar un Ägypten möht sik, de noch to verlängern. As de Narichtenagentur afp schrifft, schall den Scheethool nochmal 24 Stünnen duern. Güstern Avend hett de Hamas söss Gieseln frielaten, Israel dorför 30 palästinensche Häftlingen.
Beradens över Nadragshuushoolt 2023
De Bunnsdag warrt sik vundaag mit den Nadragshuushoolt för dat johr 2023 befaten. Wegen dat Huushooldsoordeel vun dat Bunnsverfatensgericht will de Ampelkoalitschoon wedder de Schullenbrems utsetten. So schüllt Krediten över 45 Milliarden Euro afsekert warrn. De Ampelkoalitschoon hett dat Geld tomehrst all för de Energiepriesbrems in Bruuk hatt.
Lettland köfft düütsch Luftverdedigenssystem
Lettland hett en Verdrag över den Kööp vun dat düütsche Luftverdedigenssystem Iris-T vun 600 Millionen Euro Hööchd afslaten. Dat Raketensystem schall 2026 utlevert warrn, so dat Verdedigensministerium in Riga. Lettland hett den Kööp tosamen mit Estland vereenbort. De Luftverdedigen gellt as swacke Steed bi dat Militär vun de baltischen Staten.
Bund will gegen Klimaschuuloordeel vörgahn
De Bunnsregeren will juristsch gegen dat Klimaschuuloordeel vun dat Böververwaltensgericht Berlin-Brannenborg vörgahn. Dat Gericht harr de Regeren verplicht, ogenblicks Programmen optoleggen, üm den CO2-Utstoot vun Hüüs un Verkehr to minnern. Ut de Sicht vun Verkehrsminister Wissing harr dat Oordeel keen Relevanz, wieldat dat Gesett, wat bekrittelt warrt, bald ännert warrn schall.
Flooghaven Hamborg Liddmaat bi Airbus-Nettwark
De Flooghaven Hamborg drievt Plaans, Waterstoff in de Luftfohrt to bruken, wieder vöran. Düssen Vörmiddag schall en Kooperatschoonsvereenboren mit mit Airbus ünnertekent warrn. Maal is, beter över den Bruuk vun Waterstoff as Drievmiddel för Flegers to forschen. An dat Nettwark sünd mennig internatschonale Flooghavens, Floogsellschopen un Energieünnernehmens bedeligt.
Arbeitslosentall in Sleswig-Holsteen licht anwussen
De Tall vun de Arbeitslosen is in Sleswig-Holsteen in’n November verglieken mit den Maand vun’t verleden Johr licht anwussen. In Heel weren 87300 Lüüd ahn Arbeit, dat sünd 4700 or söss Prozent mehr as in’n November 2022.
Över uns
PLATTRADIO is en Afdelen vun den Sleswig-Holsteenschen Heimatbund un warrt föddert vun dat Land Sleswig-Holsteen.
Uns Kooperatschoonspartners sünd de NDR un de Apen Kanal Sleswig-Holsteen. Opdrag vun de nedderdüütsche Medienplattform PLATTRADIO is dat journalistische Berichten över relevante Schehnissen in Welt un Region - frie un oprichtig.
mehr wiesen
