LGBTQ un Antisemitismus - Interview mit Regenbagen-Aktivistsch Annie Heger
Greta Thunberg deelt en Post vun en Organisatschoon, de will, dat Israel verswinnt; Regenbagen-Fahns weiht op pro-palästinens'sche Demos. Hett de Antisemitismus en faste Steed in progressive Milieus?
Dat hett güstern den 85. Johrsdag vun de groten Pogromen in’t Johr 1938 nich bruukt, üm dat Thema Antisemitismus in de Künn to bringen. Siet in’n Negen Oosten de Krieg twüschen Israel un de radikal-islaamsche Hamas löppt, vergeiht keen Dag, an den wi hier bi PLATTTRADIO nich dorto berichten doot. Wat wi lehrt: Rechts is de Antisemitismus nie nich verswunnen. Links jüst so wenig, man hier versteiht he sik as Kolonialismuskritik. Wi beleevt Antisemitismus in uns migrantsch-musliemsche Communities, un wi beleevt em ok in Milieus, de sik sülvst en hogen moraalschen Rang tospreekt un Frieheit inföddert. So hett Klimastreik-Grünnersch Greta Thunberg vör poor Weken en Post vun en propalästinens`sche Organisatschoon deelt, de dat Verswinnen vun Israel föddert, un so dükert ok in dat Ümfeld vun LGBTQ-Veranstaltens jümmers wedder de Palästinafahn op, un annersrüm is op propalästinens’sche Demos jümmers wedder de Regenbagen-Fahn to sehn. Annie Heger kümmt ut Oostfreesland un leevt in Berlin. Se is Kabarettistin un plattdüütsche Autorsch, un se is Aktivistsch in de düütsche Regenbagenszeen. Jan Graf hett Annie Heger fraagt, wat de aktuelle Situatschoon denn nich to Diskussionen föhrt ok binnen de queere Szeen. Klickt op dat Symbol in't Bild un höört, wat se antert hett.
